Mårfangst

Sidan skogsfuglane tydelegvis har harde kår om dagen, må ein jo gjere ein innsats for å betre dette. Har spent opp 4 mårfeller (Conibear) i dag, så har ein jo ein god grunn for å ta ein tur i skogen med jamne mellomrom:)

Som åte brukar eg kun honning:

Skogsfugljakt i oktober

Fuglejakta i oktober kan kort oppsummerast med at det har vore eit svært dårleg i år i dei områda eg har jakta. Har sett mellom ingen og nokre få fuglar på turane, og då er det ikkje så fristande å skyte på dei få som er heller.

Men det finst då ein og anna tiur i skogen, som har kosa seg i beitefurua:

Vindfull helg i Trøndelag

Denne helga har eg jakta skogsfugl ved Hegra i Nord-Trøndelag. Veret var bra laurdag og halve søndag, men mykje vind. Laurdagen resulterte i fire fuglesituasjonar, alle var vaksne orrhanar. Kanskje ikkje noko godt teikn for bestanden i området? Eit par av hanane burde nok ha hamna i sekken, men nok om det..Flytta meg laurdags ettermiddag til ein annan del av terrenget, og slo leir der. Natta var fin og stjerneklår, men med krafige vindkast. Vart vel kanskje årets siste natt under åpen himmel..

Morgonstemning i leiren med kaffi på gang.

Søndag jakta eg fram til to utan ein einaste observasjon. Då kom regnet i tillegg til vinden og eg tok på heimveg. Ser diverre sørgeleg ut for skogsfuglen i dette området i år. Vi får håpe eg berre leita feil plass!

Vakre vestlandsfjell

Medan elgjegrane får rasa av seg verste jaktlysta i Trøndelag, nytta eg høvet til ein tur til vestlandet, og til Volda JSPFL si jakthytte i Jolegrødalen. Fekk ein fin dag på fjellet i det fine haustveiret, diverre utan fjellrypefelling. I garna vart det 9 fjellaurar.

Idyllisk ved Jolegrøvatnet. På den bakerste toppen på biletet skaut eg dobbelbom på eit fjellrypekull:(

Det va TIUR han ha skøtti..

Det var ein regnvåt septemberdag i Trøndelag, i det herrens år 2010, at eg endeleg skulle lukkast med det gjevaste av alt, å skyte ein vaksen tiur! Vel heime siste vekta småfine 5,1kg:)

Eg hadde lista meg rundt i ei fin li ei stund, og tenkte stadig at her MÅTTE det jo bu ein tiur. For ein gongs skuld stemde mistanken, og etter to raske skot, meir eller mindre gjennom ei gran, kunne eg studere skogens konge i ro og mak.

Følelsen av å endeleg ha lukkast var fantastisk, og då gjorde det ingen ting med våte jaktkle, tung sekk og mange kilometer heimveg:)

Bli med "jaktgutta" på jakt!

To gode jaktkompisar, Kim og Bjørn Erik, driv nettstaden "jaktgutta.com". Der deler dei sine jaktlege opp- og nedturar, bilete, film og mykje anna. På denne årstida får vi håpe på mange nye bilete, både med og utan nedlagt vilt!

http://www.jaktgutta.com/

Harejakt med "jaktgutta" i lia på Lofthus. F.v. Bjørn Erik m/dunker Dolly, Per Bjarne, Kim og Øystein med dagens fangst. (Foto: Bjørn Erik Moe)

Jaktstart 2010

Sjølv om både bukkejakt, reinsjakt og diverse anna har vore i gang ei heil stund, har det alltid vore 10. september som er den verkelege jaktstarten for meg. I år har eg nytta dei to første dagane til fuglejakt i Nord-Trøndelag. Kort fortalt vart det ei svært negativ oppleving, med null vilt observert (med unntak av ei røy som sat i vegkanten på veg innover).

Tilsynelatande brukbart rypeterreng, men kvar var dei?

Vi får håpe at dette var eit unntakstilfelle, og at vilttettleiken er betre i andre område! Nye tak neste helg!

På tur med Fri Inspirasjon

I perioden 6.-21. august mønstra eg på seglebåten "Fri Inspirasjon", og sigla saman med kaptein Henrik Yksnøy og mannskapet hans frå Dublin i Irland til La Coruna i Spania.

Fri Inspirasjon starta frå Volda i juli, og er på veg til Karibien. Først i juni neste år er dei ventande attende.

Etter nokre dagar med byliv i Dublin gjekk ferda på strabasiøst vis sørover mot Kilmore Quay på sørkysten av Irland, der vi låg medan vi gjorde dei siste førebuingane til turens første store havkryssing, nemleg over den myteomspunne Biscayabukta.

Heldigvis hadde vi vêr og vind med oss, og turen sørover gjekk utan problem i det store og heile. For underteikna, som alltid er oppteken av matauk, var det knytt stor spenning til fiskefangsten på turen, og etter fleire dagar med resultatlaus dorging, vart det brått liv i havet:


Navigatør Trygve og underteikna føl spent med på kva som skal dukke opp frå djupet, medan kaptein Yksnøy kosar seg med stonga. (Foto: Fri Inspirasjon)

Etter ein lang kamp kunne eg omsider slå kleppen i beistet, og ein tunfisk på 10-12kg enda sine dagar på dekk (Foto: Fri Inspirasjon):

Vi sette sjølvsagt straks kniven i fisken, og ryggfiletane hamna fort i gryta, i følgje med diverse grønsaker og anna godt. Fiskesuppa vart innteken på dekk, under ein time etter landinga. Det er vel unødvendig å seie at stemninga var på topp!

Vel framme i "syden" vart det mrolege dagar med turisme, småjobbing på dekk og "una cerveza por favor". Det må leggast til at langturseglarar verkeleg er av dei mest omgjengelege og trivelege folk eg har møtt. Nesten kvar dag vart vi inviterte ombord i nabobåtar, og praten sat laust.

Under opphaldet i Spania vart vi intervjua av ei triveleg dame frå bladet "Seilmagasinet". Resultatet kan de sjå her:

http://seilmagasinet.no/id/36330.0

Karane på Fri Inpirasjon kan følgjast på bloggen deira:

http://fri.caty.no/

Vinter i Trøndelag

Nokre vinterlege bilete frå Trøndelag: